प्रतिनिधी द.महाराष्ट्र न्यूज
सासवड पोलिसांचा मध्यरात्री हुक्का पार्लरवर छापा 26 हजारांचा मुद्देमाल जप्त दोघांविरुद्ध गुन्हा
सासवड पोलीस स्टेशनच्या हद्दीतील आस्करवाडी येथे सुरू असलेल्या अवैध हुक्का पार्लरवर सासवड पोलिसांनी
मध्यरात्री धाड टाकून कारवाई केली. या कारवाईत 26 हजार 370 रुपयांचा मुद्देमाल जप्त करण्यात आला असून दोन जणांविरुद्ध सिगारेट व अन्य तंबाखुजन्य उत्पादने (महाराष्ट्र सुधारणा) अधिनियम, 2018 अंतर्गत गुन्हा दाखल करण्यात आला आहे.
पोलीसांनी दिलेल्या माहितीनुसार, दि. 27 जून 2026 रोजी रात्री 12.01 वाजण्याच्या सुमारास मौजे आस्करवाडी (ता. पुरंदर) येथील हॉटेल कसोल कॅफे येथे छापा
टाकण्यात आला. त्यावेळी अभिजीत गणेश कामठे (वय 23, रा. चांबळी, ता. पुरंदर) आणि प्रज्योत अशोक चोरगे (वय 26, रा. सोरतापवाडी, ता. हवेली) हे ग्राहकांना बेकायदेशीररीत्या हुक्का उपलब्ध करून देत हुक्का पार्लर चालवत असल्याचे निदर्शनास आले
या कारवाईदरम्यान पोलिसांनी हुक्का साहित्य व इतर मिळून 26,370 रुपयांचा मुद्देमाल जप्त केला. याप्रकरणी पोलीस शिपाई तुषार बाळू लोंढे यांनी दिलेल्या
फिर्यादीवरून सासवड पोलीस स्टेशन गुन्हा रजिस्टर क्रमांक 294/2026 अन्वये सिगारेट व अन्य तंबाखुजन्य उत्पादने (महाराष्ट्र सुधारणा) अधिनियम, 2018 च्या कलम 4-अ व 21-अ अंतर्गत गुन्हा दाखल करण्यात आला आहे
या प्रकरणाचा पुढील तपास पोलीस हवालदार होळकर करत असून, गुन्ह्याची नोंद सहाय्यक फौजदार जाधव यांनी केली आहे.
पोलीस निरीक्षक संतोष घोळवे यांची स्पष्ट भूमिका
याबाबत सासवड पोलीस स्टेशनचे पोलीस निरीक्षक संतोष घोळवे यांनी सांगितले की
“सासवड पोलीस स्टेशनच्या हद्दीत एकही अवैध हुक्का पार्लर चालू देणार नाही. अशा प्रकारचे हुक्का पार्लर सुरू असल्याची माहिती नागरिकांनी तात्काळ सासवड पोलीस
स्टेशनला द्यावी. माहिती मिळताच संबंधितांवर कठोर कायदेशीर कारवाई करण्यात येईल. अवैध व्यवसायांना कोणतीही पाठीशी घालण्यात येणार नाही.
सासवड पोलिसांच्या या कारवाईमुळे अवैध हुक्का पार्लर चालकांमध्ये खळबळ उडाली असून, आगामी काळात अशा व्यवसायांवर आणखी कठोर कारवाईचा इशारा पोलिसांनी दिला आहे.
मुख्य संपादक – अझीम अत्तार
