प्रतिनिधी द.महाराष्ट्र न्यूज : पुरंदर तालुक्यातील जेजुरी येथील दवणेमळा परिसरात सेफ्टी टँकमध्ये बुडून दीड
वर्षीय चिमुकल्याचा दुर्दैवी मृत्यू झाला. शिव अविनाश हितापूर (वय १ वर्षे ६ महिने) असे मृत्यू झालेल्या चिमुकल्याचे नाव आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, शिव हा चिमुकला सकाळी साडेअकराच्या सुमारास घरातून अचानक बेपत्ता झाला
त्यानंतर कुटुंबीय व शेजाऱ्यांनी परिसरात त्याचा शोध सुरू केला. मात्र, बराच वेळ शोध घेऊनही तो आढळून न आल्याने जेजुरी पोलिसांना याबाबत माहिती देण्यात आली.
पोलिसांच्या मदतीने शोधमोहीम सुरू असताना घराजवळील सेफ्टी टँकमधील पाण्यात बुडबुडे दिसून आल्याने संशय आला. त्यानंतर टँकमधील पाणी काढण्यात आले असता चिमुकला त्यामध्ये आढळून आला.
कुटुंबीयांनी त्याला तातडीने जेजुरी येथील आयसीयू हॉस्पिटलमध्ये उपचारासाठी दाखल केले. मात्र, डॉक्टरांनी तपासणीनंतर त्याला मृत घोषित केले.
या घटनेची माहिती मिळताच जेजुरी पोलिसांनी घटनास्थळी धाव घेतली. या प्रकरणी पुढील तपास जेजुरी पोलीस
करीत आहेत. चिमुकल्याच्या दुर्दैवी मृत्यूने हितापूर कुटुंबावर दुःखाचा डोंगर कोसळला असून, परिसरात हळहळ व्यक्त होत आहे.
मुख्य संपादक – अझीम अत्तार
