प्रतिनिधी द. महाराष्ट्र न्यूज :पुरंदर तालुक्यातील नायगाव येथील म्हसोबा मंदिरासमोरील रस्त्यावर दोन दुचाकींची समोरासमोर भीषण धडक होऊन एका युवकाचा जागीच मृत्यू झाल्याची दुर्दैवी घटना शुक्रवारी (दि. ३ जुलै) सायंकाळी साडेपाचच्या सुमारास घडली. या प्रकरणी
जेजुरी पोलीस ठाण्यात फेटल मोटार अपघात रजिस्टर क्र. 06/2026 दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, मध्य प्रदेशातील सागर जिल्ह्यातील देवरी तालुक्यातील कुलारी येथील रहिवासी
दुर्गेश ठाकूर (वय ३५) हे एमएच 12 एक्सडी 8867 क्रमांकाच्या मोटारसायकलवरून पारगाव मेमाणे येथून
नायगावच्या दिशेने जात होते. नायगाव गावाच्या हद्दीतील म्हसोबा मंदिरासमोरील रस्त्यावर समोरून येणाऱ्या अज्ञात मोटारसायकलची त्यांच्या दुचाकीला समोरासमोर जोरदार धडक झाली.
या भीषण अपघातात दुर्गेश ठाकूर यांना गंभीर दुखापत होऊन त्यांचा घटनास्थळीच मृत्यू झाला. तर समोरील अज्ञात मोटारसायकलवरील चालक गंभीर जखमी झाला
असून त्याला उपचारासाठी उरुळी कांचन येथील रुग्णालयात दाखल करण्यात आले आहे.
या घटनेची खबर रुपेश मुन्ना ठाकूर (वय ३०, रा. कुलारी, ता. देवरी, जि. सागर, मध्य प्रदेश) यांनी दिली. त्यानुसार जेजुरी पोलीस ठाण्यात फेटल मोटार अपघाताची नोंद करण्यात आली आहे.
सदर प्रकरणात पोलीस हवालदार एस. बी. लोंढे यांनी नोंद केली असून सहाय्यक फौजदार कारंडे पुढील तपास करीत
आहेत. अपघाताचे नेमके कारण तसेच अज्ञात दुचाकी व तिच्या चालकाची ओळख पटविण्याचे काम पोलीस करीत आहेत.
मुख्य संपादक – अझीम अत्तार
